穿針線的手

24120/《穿針線的手》Tshīng Tsiam-suànn ê Tshiú
王俊傑Ông Tsùn-kia̍t

十三歲彼一冬
tsa̍p-sann huè hit tsi̍t-tang
伊頭一擺攑著針
i thâu tsi̍t-pái gia̍h tio̍h tsiam
認真共線穿予過
jīn-tsin kā suànn tshīng hōo kuè
學做衫並無輕鬆
o̍h tsò -sann pīng bô khin-sang

日子一工過一工
ji̍t-tsí tsi̍t-kang kuè tsi̍t-kang
做袂了的美麗新衫
tsò buē-liáu ê bí-lē sin-sann
只有替別人咧做
tsí-ū thè pa̍t-lâng teh tsuè
攏無一領是家己的
lóng bô tsi̍t-niá sī ka-kī ê

時間永遠攏無等人
sî-kan íng-uán lóng bô tán lâng
一雙囡仔手
tsi̍t-siang gín-á tshiú
這馬攏皺痕
tsit-má lóng jiâu-hûn
只有予針揬著的時陣
tsí-ū hōo tsiam tu̍h--tio̍h ê sî-tsūn
毋管細漢大漢
m̄- kuán sè-hàn tuā-hàn
疼的滋味心內吞
thiànn ê tsu-bī sim-lāi thun

一雙穿針線的手
tsi̍t-siang tshīng tsiam-suànn ê tshiú
付出無需要理由
hù-tshut bô su-iàu lí-iû
一針一線
tsi̍t-tsiam tsi̍t-suànn
穿過阮的生活
tshīng kuè gún ê sing-ua̍h
頭毛白
thâu-mn̂g pe̍h
毋知影
m̄ tsai-iánn

但是目睭流目油
tān-sī ba̍k- tsiu lâu ba̍k-iû
線欲過針穿真久
suànn beh kuè tsiam tshīng tsin kú
只有孤單毋敢講予人聽
tsí-ū koo-tuann m̄-kánn kóng hōo -lâng thiann
手攑著香
tshiú gia̍h tio̍h hiunn
請神明保庇啦
tshiánn sîn-bîng pó-pì--lah

手攑著香
tshiú gia̍h tio̍h hiunn
請神明保庇啦
tshiánn sîn-bîng pó-pì--lah