心碎酒醉

《心碎酒醉》Sim Tshuì Tsiú-tsuì
方順吉Png Sūn-kiat

點一枝薰
tiám tsi̍t-ki hun
看著窗外的雲
khuànn-tio̍h thang-guā ê hûn
一時忽然間
tsi̍t-sî hut-jiân-kan
空氣使人心憂悶
khong-khì sú lâng sim iu-būn
冷風吹入窗門
líng-hong tshue ji̍p thang-mn̂g
加添阮的辛酸
ka-thiam gún ê sin-sng
只怨命運
tsí uàn miā-ūn
來作弄咱緣份
lâi tsok-lōng lán iân-hūn

唱這首歌
tshiùnn tsit siú kua
這首予你的歌
tsit siú hōo lí ê kua
一句一聲
tsi̍t-kù tsi̍t-siann
只有你才會知影
tsí-ū lí tsiah ē tsai-iánn
彼當時有你陪伴
hit-tong-sî ū lí puê-phuānn
如今只有孤單
jû-kim tsí-ū koo-tuann
大聲叫出心愛你的名
tuā-siann kiò tshut sim-ài lí ê miâ

毋知你的心肝
m̄-tsai lí ê sim-kuann
敢猶有現在的我
kám iáu-ū hiān-tsāi ê guá
抑是已經
ia̍h-sī í-king
佮著別人來生活
kah tio̍h pa̍t-lâng lâi sing-ua̍h

心碎也無人來伴
sim tshuì iā bô-lâng lâi phuānn
酒醉也無人來看
tsiú-tsuì iā bô-lâng lâi khuànn
我半茫半醒
guá puànn bâng puànn tshínn
目屎已經予風吹焦
ba̍k- sái í-king hōo hong tshue ta